بابا مات فى حادثة و انا اتشليت لما عرفت .. يا ترى خطيبى هيعمل اية لما يعرف

لسه مش قادرة أصدق..حاسة إني بحلم وهقوم من الحلم ألاقي بابا واخدني فـ حضنه وبيطمني
كان هو كل حاجة فـ حياتي بعد ما أتحرمت من أمي وأنا لسه صغيرة ، ضيع عمره كله في تربيتي وتعليمي !

شهرين ع وفاة بابا ، أسوء ليلة عدت عليا ..
ليلة واحدة قلبت حياتي 180 درجة
قمت من النوم تعبانة جدا ومش قادرة أتحرك.. بابا قالي أنا هنزل أجبلك علاج من الصيدلية
الوقت كان متأخر والجو برد ومطر شديد جدا..عدى نص ساعة وحسيت إن بابا إتأخر
فجأة تلفوني رن.. نمرة بابا

- أيوة يا بابا أخرت ليه كده ؟!

• باباكي خبطته عربية فـ الشارع ومرمي ع الرصيف..أنا كلمت الاسعاف ، أتمنى يلحقوه قبل ما يموت..ربنا يكون فـ عونك

- إيه؟!إنت مين؟؟طب أعمل حاجة .. أبوس إيدك انقله ع أي مستشفى قريبة منك ، الوقت متأخر والإسعاف ممكن يتأخر عليه ، ابوس إيدك !

(بيعيط) :
• اسف ، لو لا قدر الله جراله حاجة هدخل ف سين وجيم وهيحققوا معايا !

حسيت ان روحي بتتسحب مني ، مش عارفة أعمل إيه ،مسكت التليفون واتصلت ع إياد خطيبي والراجل التاني والوحيد فـ حياتي بعد بابا ..مكنتش قادرة أتحرك بس اتحاملت ع نفسي ونزلت جري ع المستشفى ..
كان إياد وصل قبلي ، سألت الدكتور وأنا خايفة مش عايزاه يجاوب عليا ! بكدّب إحساسي

-شدي حيلك يابنتي ، البقاء لله

اغمى عليا ولما فوقت لقيتني نايمة ع سرير ف مستشفى
فتحت عنيا لسه بجمع .. بصيت حواليا لقيت إياد متبت فـ إيدي وعمال يعيط ، حاولت أقوم عشان أسند ضهري مقدرتش حسيت إن رجلي تقيلة أوي مش قادرة أحركها

- حمدالله ع السلامة يا مي..ارتاحي مش عاوزك تتحركي خالص

• هو إيه اللي حصل ؟! أنا مش قادرة أحرك رجلي ليه ؟!

حط وشه فـ الأرض وهو بيعيط بحرقة ،

أنا إتشليت !!

جالي شلل نصفي..مش هقدر أمشي ع رجلي تاني
هعيش بقية حياتي ع كرسي متحرك..انفجرت فـ العياط

• طب ليه ؟!..ما كان ربنا خلاني أموت بقى أهون من العذاب اللي هفضل عايشة فيه ده !

- وحدّي الله يا مي متقوليش كده..متعترضيش ع قضاء ربنا وارضي باللي انكتب..وبعدين أهون عليكي تسيبيني لوحدي،هو أنا ليا مين غيرك؟!

• طب منتا بقيت لوحدك أهو ، أنا بقيت مشلولة عارف يعني إيه مشلولة؟..
يعني أنا بقيت حمل تقيل عليك وإنت إتورطت معايا
هتقبل تكمل حياتك مع واحدة مشلولة عايزة اللي يخدمها ويراعيها زي العيال الصغيرة ؟!
هترضى تضيع شبابك ع واحدة مش هتقدر حتى تلبس نفسها بعد كده ؟!
هتستحمل ؟! اه هتستحمل ، شهر ،اتنين ، تلاتة ، سنة ؟!
وهتزهق مني وتحس إني بقيت تقيلة ع قلبك
وأنا معنديش إستعداد أعيش الموقف ده ومش هستناه يحصل ،

أصعب حاجة ممكن تجرحني إن حد يبصلي بشفقة ويعطف عليا..
عشان كده إنت مش مجبر تكمل معايا
وأنا عشان بحبك هتمنالك الخير وأتمنى أشوفك مبسوط فـ حياتك..أنا مبقتش أنفعك ، خد دبلتك يا إياد وإنساني !

- صلي ع النبي كده وإستهدي بالله يا بنت الناس ، إنتي عارفة إن مفيش ولا كلمة من الهبل اللي إنتي قولتيه ده هيحصل لا بعد شهر ولا بعد سنة ولا بعد مية سنة،إنتي عارفة أنا بحبك قد إيه وإنتي كمان بتحبيني ، أنا هعذرك بس عشان الصدمة والحالة اللي إنتي فيها ، بس شيلي الموضوع ده من دماغك ومتفكريش فيه نهائي !

إياد كان بيحبني جدا وأنا متأكدة إنه هيفضل جمبي مهما حصل بس كنت خايفة ، خايفة يكون إتورط معايا وإتحمل مسؤليتي .. أنا بحبه جدا ، مش هستحمل أشوفني حمل تقيل عليه !
______________

من بعد وفاة بابا وإياد مخليني مش عايزة حاجة،عمره ما قصر معايا وعمري ما حسيت إنه عايز يسيبني أو زهق مني
بالعكس ده بقى يحبني أكتر من الأول ..
كل يوم يجي يزورني هو وأخته ندى ، هيا كمان كانت بتهتم بيا وحسيت إنها أختي..
مبقاش ليا غير إياد وندى فـ حياتي
أمي ماتت وأنا لسه طفلة وأنا وحيدة لا ليا أخ ولا أخت ، عشت طفولة بائسة كئيبة ، مليش أصحاب ، انطويت ع نفسي وأوضتي كانت هيا كل حياتي !
______________

عدى سنة ع وفاة بابا !
سنة ع أسود ليلة قضيتها فـ حياتي
وسنة ع حرماني من المشي ع رجلي ..
سنة وأنا قاعدة ع كرسي متحرك
وسنة ولسه إياد جمبي بيهون عليا الأيام
ولسه حبه ليا زي الأول وأكتر

إياد نعمة فـ حياتي بحمد ربنا عليها
فـ اليوم ده إتصل بيا الصبح بدري

- صباح الفل ع أحلى مي شافتها عنيا

• صباح الورد .. أنا أعرف إنك بتفضل نايم لحد الضهر،مش عوايدك يعني تصحى بدري كده ..خير إن شاء الله ؟

- لا مهو إنهارده يوم مختلف..انهارده سنوية باباكي الله يرحمه

• مش عارفة أقولك إيه يا إياد ..مجاش فـ بالي إنك لسه فاكر يوم وفاة بابا !

- مقدرش أنسى طبعا ، ربنا يرحمه ..يالا جهزي نفسك عشان نزوره فـ المقابر ، هجيلك أنا و ندى بالعربية، سلام يا حبيبتي

• إياد ؟!

- أيون ..

• أنا بحبك أوي ربنا ما يحرمنيش منك أبدا

- اقفلي طيب عشان الرصيد والنبي D: بحبك دي تقوليهالي وأنا عيني فـ عينك ..

________________

وإحنا فـ المقابر .. افتكرت كل لحظة قضيتها مع بابا ، وحشني جدا
نفسي أرجع أشوفه تاني وإتكلم معاه ولو خمس دقايق حتى !
لاحظت إياد عمال يعيط بطريقة هيستيرية أول مرة أشوفه بيعيط بالشكل ده وكأن باباه هو اللي مات
موت بابا مأثر فيه بالشكل ده ؟!
إياد طيب وحساس جدا وكان بيحب بابا أوي وبيعتبره زي والده..
رجعنا من المقابر ..
كنت مبسوطة ، إياد كل يوم بيثبتلي إنه أكبر نعمة ربنا أنعم عليا بيها

- إياد..أنا بجد مش عارفة أقولك إيه ومش لاقية أي كلام أقوله فـ حقك ، إنت الحسنة الوحيدة فـ حياتي .. إنت اللي مخليني عايشة لحد دلوقت..
ربنا يقدرني وأسعدك وأخليك مبسوط .. أنا عايزة أفرحك زي ما بتفرحني

• مممممم،يعني لو جاتلك فرصة تساعديني مش هتترددي ؟!

- إيه اللي إنت بتقوله ده ؟! أتردد؟..بعد كل اللي إنت عملته معايا وأتردد؟!..دنا أبقى معنديش دم

• متأكدة ؟!

- طب جرب تطلب مني أي حاجة ، والله العظيم لو طلبت عنيا دلوقت ما هتأخر عليك ومش مبالغة ولا كلام .. أنت أغلى حاجة فـ حياتي ، إنت أغلى من حياتي نفسها
هتصدقني لو قولتلك إني بقيت أشوفك زي بابا فـ حنيته وخوفه عليا؟!
إنت قدرت تعوضني عن غياب بابا الله يرحمه

بدأ يعيط ، بقيت مستغربة ليه كل ما أجيب سيرة بابا تأثر أوي كده ؟!..بدأ يتكلم وهو بيمسح دموعه

• بس جايز فـ يوم من الأيام تجيلك الفرصة وتبقى فـ إيدك وتضيعيها..جايز اليوم ده يكون ... إنهارده مثلا ؟!

- !!..إنت عندك شك فـ إني أساعدك ؟! إنت بتهزر ؟! ..وبعدين ثانية واحدة تعالى هنا ، تقصد إيه بانهارده دي ؟ أنا حاسة إنك عايز تقول حاجة ومخبيها عليا .. فيه إيه ؟!

• مفيش ، أنا بجس نبضك بس ، بختبرك ! مش جايز أموت أو يجرالي حاجة ؟!

- بعد الشر عليك أوعى تقول كده تاني دنا أروح فيها

• محدش ضامن عمره !

قام باس إيدي وحب ع راسي وهو بيعيط :

• خلي بالك من نفسك وعايزك تعرفي إني بحبك أوي .. سلام

قلبي مقبوض ، حاسه إنه مخبي عليا حاجة أو هيجراله حاجة
طريقة كلامه ونبرة صوته فيها حزن .. أنا سمعت مرة إن الميت بيبقى حاسس إنه هيموت قبلها بفترة ! معقولة ؟!
حاولت أطرد الفكرة من دماغي ...
مفيش بعد ما مشي بنص ساعة اتصل عليا رديت بسرعة

- مالك يا إياد فيك إيه بس؟..إنت كويس؟!

• أنا كويس مفيش حاجة بس اتصلت عشان أقولك هبعتلك تسجيل بالليل

- تسجيل؟!..تسجيل إيه ده ؟!

• فيديو ، هسجله وأبعتهولك ع الواتس .. ما تسيبيش الموبايل من إيدك ، سلام

قلقني أكتر .. شكوكي زادت ، تسجيل إيه ده اللي هيسجله ؟!
مكنش قدامي غير إني أستنى .. مصير مجهول !

_______________

*الساعة 10 بالليل*

قاعدة جمب الشباك وماسكة الموبايل فـ إيدي مستنية أعرف حكاية التسجيل اللي قال عليه إياد..

الدنيا برد والسما كانت بتمطر ، الليلة دي عدت عليا قبل كده
ليلة وفاة بابا .. !
قطع سرحاني صوت رسالة الواتس فتحتها بسرعة،استنيت لما الفيديو يحمل .. شغلته لقيت إياد قاعد ع كرسي وهيبدأ يتكلم ، عليت الصوت وبدأت أسمع وأنا مرعوبة :

- يُتبع