إذا كنت لا تجد بحثك في موقعنا يمكنك طلبه منا الأن. لدينا فريق كامل في مختلف المجالات ويمكننا إنجاز بحثك باللغتين العربية والإنجليزية كامل مع المراجع. كما يمكننا توفير خدمات الترجمة بأسعار منافسة.
تواصل معنا الآن عبر الواتس 201118865884

قصتى مع الإكتئاب

الاكتئاب..يمكن ده محور حياتي تقريبا. القصة بدأت من و انا صغير , ماما كانت شخص عنيف شوية و والدي ظابط ماكنش متواجد معظم الوقت. كنت انطوائي جدا مش بتكلم مع حد معظم سنين دراستي في المدرسة ..معارفي كانت اتنين او تلاتة ..فاشل اجتماعيا و بتعرض للأهانة و الضرب من زمايلي معظم الايام..طفل بائس جدا الصراحة..ماكنتش بخرج لان ماكنش عندي صحاب و امي بتخاف عليا بشكل وسواسي و والدي مش فاضي..مافتكرش اي وقت كنت مبسوط فيه.
بس علي النقيض كنت دحيح في الدراسة و شاطر..بدأت اتفاعل مع الناس شوية في ثانوي و دخلت في علاقة عاطفية دمرتني تاني في الفترة دي..دخلت طب اسنان بعدها و كنت بطلع طاقتي كلها في المذاكرة و كنت من اوائل الدفعة بس علطول كنت عارف ان مكاني بشري بشهادة الدكاترة.


من هنا حصل تغييراغرب و اسوأ..بدأت اقطع علاقتي بالناس اكتر (اللي هي منعدمة اصلا) و انام كتير , بقيت بخاف من كل حاجة و جسمي علطول تعبان و مرهق, مش باكل , مش برد علي حد و كأن الكلام مجهود رهيب جدا , مش قادر اركز في حاجة , بعيط علي اي حاجة , كئيب طول الوقت و بفكر في الموت بشكل غريب , حاسس العالم كله ضدي و اني مستحقش اعيش..انا عايش ليه انا مفيش حاجة بتفرحني ..اهلي افتكروا عندي سرطان من كتر ما خسيت و كانوا بيزعقولي عشان مش بتكلم ولا برد عليهم..حتي الناس القريبة مني كنت حاسس بالذنب ناحيتهم و اني عالة عليهم , بقت كل لحظة انا صاحي فيها عبارة عذاب مش عايز ابقي واعي.
و في يوم الفجر قررت انزل و فضلت قاعد في الشارع و بكتب جواب اللي هسيبه للناس عشان قررت انتحر و فضلت قاعد اربع ساعات مش لاقي حاجة اكتبها و ساكت, و فكرت من يومها اروح القصر العيني اكشف..في خلال كام ساعة كنت في القصر العيني متشخص بأكتئاب حاد و اتكتبلي دوا بس تعبني جدا ..ده كله من ورا اهلي لاني قلت مش هيفهموا.
بعد كده روحت لدكتور في عيادة خاصة وقفلي الدوا و قالي هنستمر علي علاج بالكلام بس و لكن انا مستريحتش معاه و وقفت العلاج..و خرجت من النوبة دي بدون حاجة..و بعدها بكام شهر رجعتلها بشكل اسوأ و لكن المرة دي كنت متابع مع استشاري و بدأت دوا علطول..معروف ان الادوية دي بتحتاج شهور للحصول علي نتيجة كويسة.
علي التوازي كنت انا ببحث و ادور في المجال لحد تقريبا ما بقي حاليا الدكاترة بتفتكر ده تخصصي بالذات علم الادوية النفسية "psychopharmacology”
و لسه مخلص بحث قريب تحت رعاية اكاديمية البحث العلمي و القصر العيني.
و الجدير بالذكر بردو اني بعاني من صداع يسمي بالصداع العنقودي..ف من اجراءات التشخيص بنعمل رنين علي المخ..ف لقينا عندي زي اصابة بسيطة خالص مفيش ضرر منها يعني و كل الدكاترة اجمعوا انها بس مشهورة عند الناس اللي عندهم الصداع ده..و لكن في اوراق بحثية كتير ربطته بالاكتئاب.
و في نفس الوقت كان عندي نقص شديد في فيتامين د..بعد علاجه اتحسنت جدا.
اللي يشوفني دلوقتي ميشوفنيش من 3 شهور و هم بيفكروا يحجزوني في المستشفي.
الاكتئاب مرض عضوي زيه زي السكر..مش المفروض تعاني لوحدك, الاحصائيات بتقول 30% عندهم ..نسبة كبيرة جدا.
بيتعالج والله ..بس رحلة العلاج عايزة طولة بال..انا مش بقول بالضرورة ان كله عنده اصابات في المخ او نقص في فيتامين د..دي امثلة عشان تدرك انه النواقل العصبية في المخ بتتأثر بمليون حاجة.
و لسه في معلومات كتير اوي للناس المهتمة..

إرسال تعليق

0 تعليقات